مالقيت غير نضيده............ غوش الحبايب وين جيت انريده الدايم الله

ما لقيت غير اوهامه................... وجرة البيت امنين دق ارمامه
وجامع امصلى دايره قدامه........... مبني لذكر الله ولتوحيده
والله عقاب امراح للرزّامه ............ امنين حاش راعيها بعد ترقيده
وامنين ماعليها بكروا وسـّامة......... وداروا مكابر نار , نار شديدة
وامنين حشوها بالحيل زاد غشامه.... صايرله مصار الجافلة الشريدة
شراريد جابوله تريس حشامه .........لأم الشعافي عندهم تعضيده
الواحد بقوة عزم وانزدامه ............ يطيح القعود امنين يحصل فيده
جيل حشوها حطوا عليه علامة........ اتبان فاهرة فوق الخدود جديدة
ووين وسموا جاهم لذيذ ايدامه ....... فوقه لحم طايب بلا تقنيده
عاشو نصيب اسنين في انسجامه...... بلعبة القار وكورة الجليدة
لكن الدنيا ريحها برامة.................. اتزهي نصيب وعندها تبليدة

ما لقيت غير آثاره....................... وحيط النضادي في مكان ادياره
ما ادقول نازل كان في موكاره ......... بين عرق وارويمص يدير اجليده
وما من البيت اللي وسيع مداره......... في وسط خير كثير عايش سيده
وغالي عليهم دوم قول:ايساره ......... الضيف يكرموا عاشوا حياه سعيدة
أيامن وهو محسن الجار لجاره .........عليه يقسموا لوكال من قديده
واليوم غوشهم قشـّـع اغبي تذكاره .... وغبين اوهام البير وامواريده
الدايم الله ما من حبيب توارى......... حصل تحت ماللي واثقات لحيده

مالقيت غير نزاوي ..................... ابيار يصهدن فرّاغ ماهن شاوي
حطبهن ابقي بين الميوح كداوي .....من ضيم الهبوب الشين واتشرييده
لهن زمان ما راعن كبير اسطاوي ... ينظف الميح ويحفره بحديده
الشايب بقي حاصل قصير خطاوي ...... مغير متكي قاصر على التقعيده
ماعد يعقد من جديد شكاوي ......... حليب ضانهن عاقد اتقول رغيده
ولا عد يعدي م الجهيم الضاوي....... يصيّد وجا قانص وشايل صيده
ولا عد يعدي للجريد اجلاوي ........ وايجي بقافلة شايل احمول صعيده
ولا عاد يزرع زرع بين علاوي ...... صايمات من زاعب يزوم رعيده
ولاعاد يحضر في نهار عداوي ........ ويفك اللويّة ساعة التجريدة
أيام الفتى مرّن امرور ضحاوي ........كل يوم فرحة يوم حزن ضديده
كمّين نجع داير في لبساط زداوي ....... أجواد عندهم تاصيل في التجويدة
حتى وهو العام عطيب ميره شاوي....... بالضيف عندهم ترحيب وتودويده
مامن الذود اللي اسماح مقاوي ........ امباجيد رعيانه شكوا من كيده
بنّت عبسها كيف ريح الجاوي ........ اتحيد من علي قلب النكيد نكيده
فراسين هلها وين نق الداوي ......... يداعوا على اللي شين ضيم صهيده
الغازي يريد وخاذها مو ماوي ........ ركيّب اسعايا بالبلاش يريده
وصاحب المال يهدّ عزمه قاوي ....... عليه من حلاله ما تهون غديده
يبقى رقيق الدق سوقه كاوي......... يقحّز خفيف الروز من تكميده
ويندم اللي طامع يريد سعاوي ......... وايجي الكيد ع الكدّوم بيده بيده
نزالين هلها في ربيع نقاوي ......... للوطن المطرّف عندهم ترويده
ولكن الدنيا برمها عسراوي ......... اتقابل أيام وعندها تنكيده

...... ما ألقيت غير نضيده

ما من تريس اكساح............ انجتم القوم وصار فرط اسلاح يحموا مالهم

مامن تريس اشراف ......... اسماح الطبايع والقلوب انظاف
م الخالق اللي خالق الكون يخاف......... ايسبح بطول الليل في سبّاحة
سباع في خلا واسياد لأم اشعاف ......... م الذود كل حد منهم عليه امراح
عليه ينزلوا ديما لهم مصياف ......... المنهل اللي معمور مو نزّاح
بركيّب اتقول نخيل دار حجاف ......... في وطن خالي غالب السرّاح
مهاميل في الدفة وفي الاجواف ......... حنين حشوها تحلف زنين اجباح
جملها مثيل الصوندا بقراف ......... وهي واجدة دارت احذاه جناح
وهو انكان حق اجمال مو خواف......... شجيع وين ماعارك قبوله طاح
في الغارب امنين ايقصرن لكتاف ......... ماضيات نيبانه اتقول رماح
ايميزر بذيله منقلي سكراف ......... اتفوح بنّته هايج اصنانه فاح
وفوقه سنامه مشرفه مشراف ......... اتقول صنم عالي نوقحه نوقاح
عليه وين مايبقى الموكر هاف ......... ينوض وين مادوبه ضوا الصباح
ان هدّر وجاها عندها التفاف ......... واتنوض اتهافى خايفة ذيّاح
وهي جاية م الكوز والادفاف ......... ياما اتقطّع من هشاش بياح
يبقن ارقابها تحلف ارقاب زراف......... ابطول النهار اتلق ما ترتاح
واللي عاقبه ترجف رجيف اتخاف ......... ينشحها بنيبانه لها نشاح
عند المسا جبّا علي مغراف ......... وجا لموكره تما لها ركّاح
كسوبة اجواد منسبين اشراف ......... بوادي منازلهم ديار اسماح
وينما يبان نزيل في المخراف ......... امطار مزنهن حضّن وبرقه لاح
ايجوه بجوابد من جميع ارياف ......... معوزلين مو غايب ولا فلاح
الغوط الصيام يقسموه انصاف ......... يسعو في مساعي خير واستفتاح
ما يعرفوا هرجة ولا اختلاف ......... ولا قول: قحّز من احذانا راح
يبقى زرعهن نابت اتقول عراف......... حجنه نابته في رمل فيه انشاح
ستين حمل قطع الصاع كيل اسفاف ......... من صابه كبيرة في سنين افلاح
يطوّل وهو عامر خزين الكاف ......... وفي وسط نعمة صاحبه مرتاح
ومامن البيت اللي وسيع ارفاف ......... ويبان الحطب داير احذاه اسناح
ويجوه المضايف كل يوم اضياف ......... ويباتوا معاهم في هنا وافراح
يجنهم ملايا مليهن سفـّاف ......... م المصرم اطباقه والحليب اقداح
ناس م لهلالية اتجيب اوصاف ......... حتى في سنين الكرب ما اتلاح
وانكان صار مد ايدين واختلاف.........فرسان عندهم هيبة تريس املاح
حتى في نهار معاقبة لطراف ......... مايريبوا منه كباش انطاح
انجا غزي غازي من عدو سيّاف......... وايريد يلغبوها نيسة المسراح
غزيان وين راعاهن الراعي خاف......... وصارت العيطة والفريق اجتاح
امنين ناض في لول تريس اخفاف .........وصار اللطام وصار فيه اطياح
وفارس اكحيله سيدها هدّاف ......... عالكتف ليسرة ضربة علي لرواح
والغازي يريد افخار جاف اجياف ......... القود سوقها مافيه باب ارباح
واسماح الشعافي خايلة لوصاف......... م القوم يوم قدعتها نهار افراح

........ و ما من تريس اكساح

رزني فيك اعيون اسماح ,اتقول اسلا ح , نهار انداح ,املاقى ضاعن فيه ارواح

رزني فيك اعيون اوساع ......... ولك نرداع ......... شرار جبينك دار شعاع
بوارق في شابيب ارجاع ......... ايام صلاح ......... اشبوب بداري مزنه لاح
تعلّى خش اوطان اوساع ......... اتدير بياح ......... وطاته منية للفلاح
معاهن للخدمة استطاع......... يريد ارباح ......... بدا فيه الوطن استصلاح
وثاني داروا فيه اقياع ......... تريس اصحاح ..... يواصل في الخدمة بنجاح

رزني فيك عيون كبار.........ودور اسطار ......... على جرعودك ظفة دار
رويتيه ببنة وازهار ......... ثناوي ماح ......... اتقول روايح عطره فاح
امنين تكاصا ع الجرجار .........نخيل الواح ......... اهتز مع سوقات ارياح
يحوس ان راعاك وينهار.........ايطيح اطياح .........اللي شايل فيده سبـّاح

رزني فيك ميامي سود......... اتقول غدارى يالطيف
غثيثك ع العاتق مبجود ......... نقضتيه وماح لفاليف
اتقول ركيب يوم ورود......... عطاش اداعك دار زنيف
ظمايا من قبلي مصهود ......... حراريق نجوم أول صيف
بذل فيه الراعي مجهود......... سقيته بالغيظ تعنسيف
تروّى دار ارجود ارجود ........ ملايا حيضانه تذريف
وصدّرها في وان برود .........اوقات العلة بتكفكيف
مع كل خراريم وهود............. خذا طول الليل تعنسيف
اصبّح طاير راس الرود ......... هنايا في مصدار عفيف
نباتتن مرغاد وعود.............. قعاري لام بهال مصيف
وهلها ناس اصحاب اسعود .....تريس بجاوية ع الكيف
اجواد يقيموا بالميجود ......... يصبوا وين اتجيهم ظيف
يبنوا في واسع منضود ....... سماح اركانه ظل وهيف
ان دارت برّاقة وارعود ........ بداري ف اول غيم خريف
يدزوله رايد ميكود .............. تراعيهم فيه مشاريف
حكيت ونا ماني منشود......... خذاني ديوان وتخريف
مع طاري لجواد انجود ......... بذكراهم عندي توليف
المعنى عن شوف الجلمود......... وصوله ماني عارف كيف
لغياته مالقيت برود..... اندير مناح..... انغرد بالصوت النواح

رزني بانن فيك ارغاب ......... عيونك سود بلا تكحيل
انتي مسع جابك جياب ......... مقامك عالي ف التمثيل
سماحة وامروّة وآداب......... خذيتي بيهن فوز الجيل
خطمتي بانن فيك انياب ....... انظاف يلجّن كيف الريل
وخد كما بارق لهلاب ......... ادّاير غيمه دار نزيل
اخشوش تكوبر فك اجداب ... امنزل م المولى تنزيل
تركّب في مشروع الباب....... وقبّل من عنده تقبيل
وعاد الغيطان ولشعاب......... ملايا منه كيف النيل
نزيله دار اطراب اطراب ...... اوهام العلوة شايل شيل
وصيّم بوفتّح وارحاب ......... وغيطان الزفرة وافضيل
تعلـّى خش اوطان عباب......... ايقنتل مازال اتقنتيل
مقاطيع يديرن حلاب ......... هشاش اكحيله فيه اتخيل
اتقابل فيه اسراب اسراب ........ مراشي سود اتقول نخيل
ايديرن حوراني والعاب ........ ضناها في وان التبهيل
معاها رجالة طيّاب ......... فراسين يحاموا النزيل
امنيد الطامع والنهاب ....... يفكوها من غير جميل
وما خطرها غير صواب......... غلا ريدي فايزة الجيل
اللي في لونه نال اعجاب ......... ونا مزّاح , كلامي صاح ....... انمجّد للزينة مدّاح

......... رزني فيك