: السـيـرة الشخصية

هو علي شحات محمد , من عائلة المهابات, قبيلة الفواخر
من مواليد اجدابيا 17/ 10/1970م.... متحصل على دبلوم خاص لغة إنجليزية, ويعمل مدرساً بالمرحلة الإعدادية. يشرف على تحرير صفحة ( تراثنا الجميل) بجريدة "أخبار اجدابيا" , تحصل على الترتيب الثالث في مهرجان الشعر الشعبي الثالث لتجمع شعبيات اجدابيا - الكفرة - الواحات . له تسجيلات ولقاءات بالإذاعتين المسموعة والمرئية , وبعض الإذاعات المحلية. علي شحات.. و نشرت قصائده في عدد من الصحف المحلية الليبية

أنكنك نويت رحيل... معاك لـذن لا تقبل عليّ جميل..بطولت الرجا

انـــكـنـــك ناوي ............ ترحل و قدري تم عندك شاوي
لا تجيب عذر و لااتدير فتاوي ............ تبرر الخونه و الخداع تزيل
ان ردت الرحيل ارحل بغير املاوي ..... دنّي جمالك للرحيل وشيل
لا في رحيلك ننقروا ع الداوي ........... و لا نقدعوا رحلك بفزعة خيل
و انكان حلّ ع الخاطر جفاك فجاوي ..... كبير هلعهن ما إيجيبهن تخليل
لنا الصبر ما كيفه اهناك امداوي .......... و حتى ان مرّ بيه يزول دا العليل
و الدنيا ان زهت ميمولها الفناوي ......... و اللي جفاك تلقاله اهناك بديل

انــكــنك نــوـت تـهون...........عشرانا و ترحل و العهود تخون
و بلا واكده واخذ خبر مشنـون .......... فينا اطري من قول قايل قيل
و اصّاعب سلاك الدين ع المديون ....... و الياس ع الغلا سيّطر و صار وكيل
خلي ما جرا ما بينـّـا مدفون............... و ان بان استره فوقه ترايب هيل
و من حاشن عليك هـنّـا غلاك يهون...... غبا وين يا مول الغثيث طويل
فيد من خلقنا رزقنا مضمون .............. و الدنيا فنا و العمر بمواجيل
و ما اهناك جافي فيه قلب حنون.......... و لا اهناك مكسب من ورا البخيل
و ما عمرهم ذرّوا الا في عون........... و ما اهناك شي غيزه بلا بنتيل
و تصليح الميوح امغير كيد يكون........ان وكّد مكان القعر في المنديل
و أرحل ونا ماني بها ممنون............ الشيله ونا عابي عليك عزيل

انـكان الـرحـيل نويـت........... و صفحة غلانا يا عزيز طويت
و بلا واكده فينا كلام خذيت .............. اتدوّر وما تلقا عليه دليل
و عشرة غلانا و العهود انسيت ........... ايام كنت خل و كنت نا الخليل
وافي معاي و سيتك داريت.................عني و تاخذ في اقدارك هيل
وفيتلي وفيت وكي جفيت جفيت........... وفاي و جفاي بهيل ماهن كيل
و الخاطر بعد لامان به غريت ............ الله أيغربك خاين وفاك قليل
ومن حاش من شوري النظر واطيت ...... ألغب قوافلك ماني عليك نزيل
و لا يشغلك حالي انكان بكيت............... أنت سبلتي وين الدموع تسيل
انديرك ونجبد ما جرا و خفيت............. و عنّا الستار اللي سدلت أنزيل
كمين هول قبلك صارلي و كميت......... خيانه و غدر وقهر وتمخليل
من ناس في عهداً مضا غاليت............خانوا وجافوني بعد تدليل
خطاهم احملت و بالفراق ارضيت ........وينما معاهم طول صبري عيل
و أرضيت ياسهم عقلي عليه وطيت ...... عدّيت صوبهم ماضي بعد لاويل
أصحاب المروّه عاليين الصيت............ الجاويد كسّابت أم اذرا ميل
هل نجع متشاوط أسمّوا عيت ............ ملفا الضيف و اللي عابرين سبيل
بعد عز كان أشتتوا تشتيت................ أربنهم اجداب و حرب وتبهديل
و غبيوا أبقي ما عاد منهم فيت........... أوهام بومهن يغرد بطول الليل
و ان خانك زمانك لا تقول أبخيت ........ الدنيا قديمة تعتدل و تميل
و راه كل شي بيد حامي البيت............ وينما عليه غاروا أصحاب الفيل

انـكنك نـويـت أخلافي....... و امهيّل علي صوبي رديم السافي
و كاره ودرت احلاف ضد أحلافي ...... و قاطع مع لنظار لمواصيل
لا نقولك كنك قسيت و جافـي........ و لا عليك في الخاطر نشيل غليل
و نصبر ونكما في الكنين أريافي........أن خثّق بشوقه خاطري الضليل
و بالاعمال ربك في العباد يكافي .......و نا مسامحك يا عين بوكمبيل

انـكنك نـويـت الـهـجـر......... خلّي فوادك صلب كيف الحجر
ما تنتظر نجمة صلاة الفجر..............أرحل امنين يبان نخم سهيل
و خوذ الاجر كلّه انكان في الصوب اجر...و نا أبعدك متحمل ذنوب نشيل

انـكنك نــويت وداعـي ..........شد الرحيل العذر ماله داعي
و نا زاد نكرب من حذاك قناعي.........عصي الدمع دمعي ما عليه يسيل
و نصبر و نكما لوعتي و أوجاعي..........الهجر اجر له نلجا جزاه جليل
و لا عاد يسعى في سريبك ساعي ......... قسيت قسوتك سدت عليك سبيل
عواصف خطاك امزّقات شراعي .........و أخطي بحرك ملاحي بقوة حيل
أحمل الموج مجدافي بقو ذراعي...........و باتت الريح و قادني الدليل
و شور شط راكح بي جا متداعي..........حطيت ألقيت ارض تأويني بعد ترحيل

7/1998 - 10/2000 :اجدابيا

يا جمر مانك طافي....حتى وينما هلته عليك السافي... حسيت لذعتك

يا جــمـر مانـك مـابـي ........ تبرد و ننسى في قديم اتعابي
الغايب اللي طايل عليه غـــيابي.......... و طايل مع طول الغياب اريافي
يا جــــمـــــر مـــا واريــتـك......... و ما بالرديم برادتي غطيتك
و اخطيتم سبايب ولعتك وانسيتـك ......... نحسابك ألا باقي رماد وهافي
اليوم في كنيني ملتحم حسيـــــتك ....... الله و العليم انم تريد تلافي

يا جـــمـر تشــفــي فــيّ ......... نساتر عليك وما سترت عليّ
و تبان كل ما ننوي نبان قـــوي.......... قوي صهد متوزهر تريد اضعافي
قلت الغلا منّه نفضت أيـــــديّ .......... و ناوي بما كافه عزيز نكافي
و بان كل ما نحساب كان خفي........... و كيل الوفا في الصوب مو متكافي
و ثار في كنيني وين قلت أهدي ......... بركان كان في غفوة واطف غافي

عــلـيك نـكابـر...............و مازلت تكوي في ضلوعي كابر
و نا عن سريب الصوب تبت وكابر.......و قانع و نطوي في اوراقي املافي
و من كبري علي صهدك الكابر كابر.....عليك وعلي روحي و شوقي نافي
و نحساب روحي ع الغوالي صابر....... رديت ردني بوقه املوّع وافي

يـا جــمـر بـيـن ضلوعي........عليك في خفا سافي رديم بطوعي
و صابر و حابس في الجفون دموعي ...... و نقول ما نجدد من جديد حسافي
و حال غايتي ما عاد ننصب نوعي......... و لا عد جديد نقول حيه أولافي
بعد جار سيل الياس في مشروعي......... و خرّب زروعاتي و نوّض كافي
معاند ورافض في الغرام ركوعي......... و كيف ما جفا الجافي نويت نجافي
بقول لا حفرت ولا نتق جربوعي .........عزا ألقيت من شاعر غليلي شافي
ومع ريح دوب أتهب مي هيزوعي ...... وزهرت وانت كاين في رمادك خافي

2001 :اجدابيا

نـظـرتي تبـسـّـمـتي مع اتدنـقـيره ........تبسّم زماني من بعد تكشيره

مــــي مــعــروفــه ........هي ود و ألاّ حقد و ألاّ روفه
نظره لها طابع حنان و خوفـه........ خليط حزن ممزوج بعذاب و حيره
في شخص عاجز صاعبات ظروفه....... طريد ياس مو ما من علي توكيره
عليه مارَّه في العمر كم حسوفــــه ....... و من كاس الندم شارب اصناف مريره
يا اللي القمر منك يصير كسوفـــه........ ان شافك يواري من حياه بهيره
العاشق علي بابك ان طال وقوفـه........ أمفيت قهر ما منك ايطول بصيره

نــــظــره عــابــــــره .... جت ع المهل و أنتي سبيلك عابره
محاصرات ميّس في السنين الغابره .....مع بسمتك زالن هموم كثيره
و من غير دي في عيني مشيتي كابره....و معاي كابره في الجوف نار كبيره

نــــظــــره خــاطـــفـه........أنظرها غلا و ألاّ امغير املاطفه
و ألاّ علي مسلم مسالم عاطفــه..........الناظر نظر في ناظره تكديره
و عرق المحنه مرّ وقته قاطفــه..........علي بسمتك تستاهلي الشكيره

1999 :اجدابيا

كيف الحـــال
ياك غير ما غيري شغلّك بال
جايك نسال عليك

جيتك جــــــــي
مالشـوق وينما جوّر الشوق عليّ
ومن قبل تحكـي فيه عندي دي
ارجـوك تسمعي حتى ان ديي طال
اعداد ما اعداي عادو القـول السي
اني نـــا لغيرك في الغلا ميّال
واعداد السوايا مـن اقــرابك فيّ
واعداد السـوايا فيّ م الجهال
واعداد المواجع فيّ ملـّي لي
واعداد المواجـع فيّ م العقال
واعداد كل عاشق في الغرام شقي
واعداد كل ساهر ليـل ليله طال
واعداد كل عاشـق وبغـلاه هني
املاقي اولافه من بعـد الاهوال
واعداد النجوم وكل كـاين حي
واعداد ما مشيت وجيتكم جوّال
واعداد كل شي وما اتخـلّي شي
متأسف علي غيبة سنين اطوال
هاضا عــــــذري
جيتك بعد ما الشوق صيّف جذري
وياك غير فيهـا جيتي تنتظري
بعدما لفيت بدون قول تعـال
وشن الاخبـــار
وشن صار في غيابي وشن ما صار
وياك غير ما غيـري شعلّك نار
وياك غير عهدك بالغلا مــازال
وياك غير ماهــو خاطرك محتار
وياك ما غيابي دارلك مشغـال
والشوق شين لو جوّر وحكمه جار
ياك غير ما اشتقتي ودمعك سال
وبالله ننشدك شــن حالة النقار
اللي بينا بالشين صال وجــال
ازعمه راه متندم علــي ما دار
والا في ظلالاته وزاد ظـلال
وشن حال القرايب وصحبتك والجار
اللي يسال واللي ما علي يسال
وكان تنشدي ع الحال بختصـار
مليت مالرجا والشوق والترحال
وجيتك او واخذ م الصميم قـرار
انتي بس والباقي جفاه حـلال

هاضا مكان لقانا .. ابكي انكان بكاك جاب منانا نين تنعمي
هانا جاني .. وهانا علي موعد غلا لاقاني
وهانا ورا صوبه ردح ميزاني .. وهانا نطقلي بالغرام لسانه
وهانا اجادلنا بضرب معاني .. وهانا نديم الشوق كاس اسقانا
وهانا حلفلي قال ما ينساني .. وما يود لا والي بود الانا
وهانا بما في داخله شاكاني .. مالشوق م الغلا من لوعته واحزانه
وهانا قريب الدم والبراني .. تعجّب لقوة صدقنا و ايمانه
هانا جينا وهانا .. على الصوب العفيف حكينا
وهانا دفنا حزن ماكن فينا .. وهانا ذرفنا دمع في ملقانا
وزاد هنا م الشوق الدفين شكينا .. وهانا بعد تسكيب كف ابكانا
وهانا الفاهم ما فهم طارينا .. بالغاز نهمسوا م الخوف م الفتانه
وهانا احتار اللي رقيب علينا .. حلل و لكن ما فهم مغزانا
وهانا اللي حساد وقضوا بينا .. وعالوا علي تخريبته مسدانا
وهانا اللي قاس الغلا تكوينه .. صبّا بما جابن يديه معانا
وهانا ونحنا شابكين يدينا .. بكينا بعد حان الوداع اوانا
هانا صار .. ملقا علي موعد غلا بقدار
وهانا وقفنا ضد للتيار .. وبعكس المصار مشا بحسب اهوانا
وهانا اداولنا الحديث اشعار .. وضعنا عفيف الغزل في ديوانه
وهانا الشاكي اللي شكا مالنار .. خففنا مصابه وينما شاكانا
وهانا و نحنا يا زمان صغار .. اضحكنا على اللي ما ارضيه زمانه
واليوم يانا يا زمان كبار .. وانواروا علي لخرين في شكوانا
هاناجيته .. وهانا علي نار انتضار القيته
يراجي و تاعب من امرار رجيته .. و ضحكن عيونه كي اوصلت الحانه
اللي لا يهون و لا نهار انسيته .. ولا تصير لا نقدر علي نسيانه
غالي علي اصاعبت قسميته .. من ناس ما الصوب اسمروا من نيرانه
ومازلت نرجا في كريم عطيته .. كاتب غلاه ايسهله جرنانه
ويجبر خواطرنا و تصدق نيته .. ونيتي و نبنوا من جديد ابنانه
خطرها مكان امنين ما حقيته .. استحضرت ماضي كادني اجحدانه
وسيرة اللي لاعند يوم الميته .. ونا كل يوم نقول حيه فلانه

شوق الغريب لداره .. وصابر علي بعد الجبا وامراره .. مشتاق للقدم

شوق الغريب الجالي الفايت بلاده من أمدد وآجالي
المطرود جبر من وطنه حبيس ليالي موحشات يخفن في بصيص نهاره
الغايب زهاه مع غياب غوالي أنحاز وطنهم تحت العدو وحصاره
وكل يوم يفني في أعداد أهالي والجرم الوحيد الرفض لستعماره
بلوايح حقوق البشر لامُبالي ويهدد بكر القرن للنفاره
أغتال كم من عيل تقول هلالي وكم بنت غره من أربات عصاره
اللي بوصفه فاقت الريم الفالي وطويل ماح سالفّه علي ظفاره
في التابوت زفّت والدما شتوالي خرخوط زينها تحت اللحود تواره
وكم طفل في عمر الزهور ايوالي صباحه عللي ناظرين بشاره
داسه حديد أمجنزرات عوالي هشّم وحاضن دفتره وحجاره
شوق الشهيد أفدا الوطن الغالي لملاقاة ربه يوم كشف اسراره
مشتاق اللقا غالي امصيّف حالي بخطوره مع بعده ولوعة ناره
الشوق زرابه الخاطر ارغب ماضي قديم زهابه
شوق وطن خالي طايلات أجدابه فوق م السّير بومه غفير أوكاره
لبارق إيخثّق عقربه لهلابه شبوبه أمدخّن قاطبات أمطاره
سفّ المواطي والعلا وأرقابه وسيوله اتطوّح في العذا ع الطاره
ونبّت ربيع أمخضبات أعشابه رقمه وشيح ولسلسه واشقاره
عفا بغو روّح رايده يشلابه الدافي دلال الطوق والخواره
نيست الخالي منيت الكسابه رفّاعة مقام اللي اقلال أقداره
سلوم للبها ذيل العرب يرقابه ولروس التريس الخيّره ودّاره
فيه بجّدت نسيت الظيم أتعابه هي والغزال مع طيور حباره
وجت شايله م الني نين غلابه وحاشت اتدادي مقدره وسكاره
علي نجع في المبدور دق أطنابه ملفاه للغرب والضيف والدوّاره
حليب كسر صافي فاض عالحلابه منها وروّا ضيفها والجاره
أحماة شيخ لا حدّث لذيذ وجابه طويل صمت صمته كايد الثرثاره
والقاصر اللي ماله دموم قرابه محسوب في حسابه من حساب صغاره
وان صار الخطا والعيب م العايابه والعايب حكا ع الظلم باستهتاره
يلقا صقوره ع الكلا ضرّابه قساوة ذراع وفرسنه وجساره
مغاوير كسّر حيلهم ركابه للكوت المتلّ اللي لذيذ مصاره
اللي امنين حس بلذع قرن أركابه إيقنّد أطراف الدير في مشواره
أسباع وينما عالي الحس تنابه اليوم الكظلّم جايبين أفخاره
كمين هزّ جاهم في خياب خيابه وعاود امواطي في الوطا منقاره
وتابعين راي الخير من شيّابه تلايت كتاب الله وان أفجاره
شوق من معاهم عاش سن شبابه لغوشّم ومو قابل حياة حضاره
مشتاق اللقا منحاز طال غيابه عني ونا مازلت في تذكاره

شوق الغريب اللافي علي وطن مو وطنه أو وطنه جافي
الراحل بلا رادة وخوفه خافي في قلب واخذ م الهموم اعباره
شوق درب غابي تحت ردم السافي لمرور القفول وجرت السفّاره
شوق قلب عاشق مشتهي القوافي بليغة المعاني واضحة الاشاره
اللي لا أقتباس ولاخبر خُرافي ولا هو خبر تعجيز للفساره
وتلمس احساسات الخليل الوافي اللي طول ليله سامرات انظاره
وبهن يقتنع ع الشوك يمشي حافي العاشق اللي م الشوق حاس مداره
باسلوب سلس وايحرّك الشوق الغافي وع العاشق ايبرّد لوعته واقهاره
عفيف لفظ مو تجريح لذع مشافي ولا بوصف فاحش مكتسي الدعاره
ولا يشتهي ع الجيد عقد ارعافي فوق جسم بالميدي اكسي بمهاره
ويجوز للخيال يزيد وصف إضافي و يطرد الحشو بفن الاستعاره
مضمونه لدى السامع دواه الشافي والراوي الدي اللي نقي يختاره
وبالناقد الجيد نوصلوا المرافي و الناقد الحاقد نتركوه يساره
وحتى انكان شعري مو غليلي شافي واضحات عند السامعين آثاره
دليلي ذكي والزاد ود اولافي وما ايتوه من تبّع دروب كباره
وارضيت قول بوطاهر زعيم اسلافي الشاعر ايبرّد لوعته بأشعاره
وعلي قول يانا مغتني من كافي لا نريد نسلّف ولا نمتاره
وعلي من عليه يزيد جمر اريافي نريد السلام ختام للقذاره